Mêts Maesllan 2: Disgyblion yn Arafu traffig

Mae ceir yn teithio'n llawer rhy gyflym y tu allan i Ysgol Maesllan ac mae'r Mêts yn ystyried sut gallan nhw wneud yr heolydd y tu allan i'r ysgol yn fwy diogel. A fydd yr heddlu lleol yn gallu eu helpu? Dyma lyfr stori sy'n cyflwyno rhai ffeithiau am yrru ar gyflymder. Mae'n llyfr perffaith i'w ddefnyddio wrth godi ymwybyddiaeth Wythnos Diogelwch ar y Ffordd rhwng y 18fed a'r 25ain o Dachwedd, a Mis Rhyngwladol Cerdded i'r Ysgol yn mis Hydref. Sicrhewch fod eich dysgwyr yn ymwybodol o effeithiau ceir yn gyrru'n rhy gyflym a rhannwch y wybodaeth yma gyda rhieni a gofalwyr eich dysgwyr.

Mae'r gyfres boblogaidd Mêts Maesllan yn parhau gyda chyfres newydd o lyfrau. Mae'r gyfres ar gael i gynorthwyo dysgwyr ar Gamau Cynnydd 2, 3 a 4 sydd ag anawsterau dysgu penodol i feistroli llythrennedd yn y Gymraeg. Mae'r gyfres yn canolbwyntio ar gamau seinegol ac ar batrymau iaith sy'n seiliedig ar 'O Gam i Gam' (Griffith, diweddarwyd gan Tomos a Jones, 2009) a'r 'Ffynhonnell Eirfaol' (Hughes, 1978).

Fel y gyfres gyntaf, mae'r llyfrau a'r gweithgareddau yn dilyn hynt, helynt a diddordebau criw o ffrindiau - Mim, Ben, Sam, a Wil (a Bob y ci) - sy'n byw ym mhentref Maesllan, ac sydd nawr yn 11 a 12 oed. Mae'r gyfres yn cynnwys pecyn o 32 o lyfrau trawsgwricwlaidd sy'n cynnwys llyfrau ffuglen, llyfrau ffeithiol ac ambell un ar ffurf mydr ac odl.

Mae'r llyfrau'n fyr i ddenu diddordeb y plant hynny sydd fel arfer yn amharod i ddarllen. Ceir gweithgareddau ar Hwb ar gyfer y gyfres sy'n cynnwys gweithgareddau digidol a phapur i gyd-fynd â phob llyfr er mwyn cadarnhau'r eirfa a'r patrymau iaith a gyflwynir.

Er mwyn cynnig parhad, ac estyniad ar y gyfres gyntaf, mae'r llyfrau a'r gweithgareddau wedi eu graddoli ar 4 lefel er mwyn datblygu sgiliau darllen, gyda phob un yn adeiladu ar y lefel flaenorol. Cychwynna'r gyfres hon ar lefel 2, a chyflwynir teitlau ar lefel 5 am y tro cyntaf.