Mêts Maesllan: Mynyddoedd Cymru

Ar yr 11eg o Ragfyr, ar Ddiwrnod Rhyngwladol y Mynyddoedd, beth am fynd ati i edrych ar fynyddoedd Cymru? Ewch ati i drafod mynyddoedd Cymru gyda'ch dysgwyr i weld faint maen nhw'n gallu eu henwi. Ydyn nhw'n gallu dyfalu uchder y mynyddoedd hyn? Dewch o hyd i'r holl atebion yn y llyfr hwn, wrth i un o'r Mêts fynd ati i greu taflen wybodaeth am 6 o fynyddoedd mwyaf poblogaidd Cymru.

Dyma gyfres o lyfrau i gynorthwyo dysgwyr ar Gamau Cynnydd 2, 3 a 4 sydd ag anawsterau dysgu penodol i feistroli llythrennedd yn y Gymraeg. Mae'r gyfres yn canolbwyntio ar gamau seinegol ac ar batrymau iaith sy'n seiliedig ar 'O Gam i Gam' (Griffith, diweddarwyd gan Tomos a Jones, 2009) a'r 'Ffynhonnell Eirfaol' (Hughes, 1978).

Mae'r gyfres Mêts Maesllan yn dilyn hynt, helynt a diddordebau criw o ffrindiau 10 ac 11 oed sef Mim, Ben, Sam a Wil (a Bob y ci) sy'n byw ym mhentref Maesllan. Mae'r gyfres yn cynnwys pecyn o 32 o lyfrau trawsgwricwlaidd sy'n cynnwys llyfrau ffuglen, llyfrau ffeithiol ac ambell un ar ffurf mydr ac odl.

Mae'r llyfrau'n fyr i ddenu diddordeb y plant hynny sydd fel arfer yn amharod i ddarllen. Ceir gweithgareddau ar Hwb ar gyfer y gyfres sy'n cynnwys gweithgareddau digidol a phapur i gyd-fynd â phob llyfr er mwyn cadarnhau'r eirfa a'r patrymau iaith a gyflwynir.