Mêts Maesllan: Calon

Tybed sawl gwaith mae calon morfil glas yn curo bob munud? Neu beth am galon eliffant? Ewch ati i weld sawl gwaith mae eich calon chi yn curo bob munud. Beth am gadw cofnod o guriadau calon y dysgwyr yn eich dosbarth? Mae'n ddiwrnod Iechyd y Byd ar y 7fed o Ebrill, felly beth am ddechrau drwy edrych ar y galon? Tybed sut mae eich calon yn newid ar ôl gwneud ymarfer corff? Beth am wneud arbrawf a chymharu curiadau eich calon ar Ddiwrnod Ffitrwydd Cenedlaethol ar y 21ain o Fedi!

Dyma gyfres o lyfrau i gynorthwyo dysgwyr ar Gamau Cynnydd 2, 3 a 4 sydd ag anawsterau dysgu penodol i feistroli llythrennedd yn y Gymraeg. Mae'r gyfres yn canolbwyntio ar gamau seinegol ac ar batrymau iaith sy'n seiliedig ar 'O Gam i Gam' (Griffith, diweddarwyd gan Tomos a Jones, 2009) a'r 'Ffynhonnell Eirfaol' (Hughes, 1978).

Mae'r gyfres Mêts Maesllan yn dilyn hynt, helynt a diddordebau criw o ffrindiau 10 ac 11 oed sef Mim, Ben, Sam a Wil (a Bob y ci) sy'n byw ym mhentref Maesllan. Mae'r gyfres yn cynnwys pecyn o 32 o lyfrau trawsgwricwlaidd sy'n cynnwys llyfrau ffuglen, llyfrau ffeithiol ac ambell un ar ffurf mydr ac odl.

Mae'r llyfrau'n fyr i ddenu diddordeb y plant hynny sydd fel arfer yn amharod i ddarllen. Ceir gweithgareddau ar Hwb ar gyfer y gyfres sy'n cynnwys gweithgareddau digidol a phapur i gyd-fynd â phob llyfr er mwyn cadarnhau'r eirfa a'r patrymau iaith a gyflwynir.