Taclo'r Tasgau: Llyfr 1

Mae'r llyfr hwn yn perthyn i gyfres o ddau lyfr sy'n cynnwys gweithgareddau darllen a deall difyr i ddisgyblion ar Gam Cynnydd 4. Eu nod yw cryfhau sgiliau darllen dysgwyr ac ehangu eu geirfa a'u gwybodaeth am yr iaith mewn ystod o gyd-destunau. Mae'r llyfrau hefyd yn cynnig cyfleoedd i'r dysgwyr ddatblygu ymhellach eu sgiliau llafar, rhifedd a rhesymu. Dyma adnodd i gefnogi dysgwyr ac athrawon gyda chynnwys profion darllen gan ategu gofynion llythrennedd Cwricwlwm i Gymru.

Dylid defnyddio Taclo'r Tasgau fel adnodd ystafell ddosbarth i addysgu yn bennaf gan fanteisio ar gyfleoedd i ehangu geirfa a gwybodaeth am iaith y dysgwyr mewn ystod o gyd-destunau. Nid oes rhaid cyflwyno gweithgaredd cyfan ar yr un pryd i'r dysgwyr. Gellid defnyddio un testun dros gyfnod o amser, gan dynnu sylw at wahanol nodweddion yn y testun wrth baratoi ac yna, roi adborth wedi i'r dysgwyr gwblhau'r dasg.

Ar ddiwedd mwyafrif y darnau mae cwestiynau trafod, ymchwilio neu ysgrifennu estynedig. Bydd y cwestiynau'n rhoi cyfle i'r dysgwyr resymu ac yn cynnig cyfleoedd gwych i ddatblygu sgiliau ehangach y dysgwyr.

Mae'r gyfres yn annog dysgwyr i ddod o hyd i'r atebion ac i gyfoethogi'u gwybodaeth trwy gyfrwng casgliad o destunau apelgar a gafaelgar. Mae'r llyfrau wedi'u graddoli ac yn gallu cael eu defnyddio yn yr ysgol neu'r cartref. Cefnogir y llyfrau hefyd gan adnoddau rhyngweithiol ar Hwb.